EXITU DE LA CONVOCATORIA DE LA COORDINADORA ANTIFACISTA

Esti sábadu 12 Xineru cellebrose en Xixón la Xornada Antifacista convocada pola Coordinadora Antifacista d'Asturies. Durante la mesma tuvo llugar una charra a cargu lxs compañerxs de la coordinadora madrileña, pa siguir cola espicha na casa sindical y el repintáu d'un nueu mural dempués de que l'anterior morriera a manes del ayuntamientu Xixón. A les 18:30 entamó'l pasucais per Xixón dende la Plaza'l Humedal fasta la del Parchís, onde lleéronse los comunicaos de la Coordinadora d'Asturies. Pa zarrar la nueche los grupos K-Nalón, Gomeru, Spitting Rage y Non Servium dieronnos un inmeyorable pieslle de la xornada, con un conciertazu dientro d'una enllena y conocía sala festexos de Xixón. Reproducimos equí'l manifiestu de la CAA:

COORDINADORA ANTIFACISTA Llunes, 17 Avientu 2007

BORRADOR DEL MANIFIESTU DEL 12 XINERU.

Ayeri cumplieronse dos meses de la muerte’n Madrí de Carlos Palomino, militante antifacista.

Carlos nun morrió nun actu de violencia fortuitu; nun se trató d’un fechu puntuable nin d’un alcuentru ente bandes xuveniles con un desenllace tráxicu, como dellos medios de comunicación recalcaron hasta la fartura.
Carlos fue asesinau…porque escoyo’l camín; porque, a los sos 16 años, fadiaba’l facismu; porque, individual y coleutivamente, opunxose a la ultradrecha que, el 11 de payares de 2007, convocada por Democracia Nacional, llamó al odiu en Madrí escontra les persones estranxeres, aquelles que nun son blanques, y qu’aporten al Estau español afalaes pola necesidá que, en munchos casos, xenera los intereses occidentales nos sos países d’orixe.

Carlos, a los sos 16 años, opunxose a un actu d’apoloxía del racismu al que, col so aprobamientu, col so asenso, sumose la delegada de gobiernu de Madrí, Soledad Mestre, a quien dende la Coordinadora Antifacista d’Asturies ponemos al cargu de lo asocedíu en Madrí el pasau 11 payares.

Nun ya de la muerte y los dos meses de la falta de Carlos….tamien del intentu d’asesinatu d’Alejandro Martín, mancau de gravedá pol presuntu asesín de Carlos, militar de profesión y nazi de vocación; y tamién de la postrera criminalización de les y los manifestantes antifacistes, cuandu los criminales, por aición y omisión, son otros

Ye sinificativu sentir a les fuercies policiales, a los partios políticos y a los sos voceros acríticos, los medios de comunicación, informar d’una ultradrecha ensin apariente peligru social, marxinal y desorganizada, cuandu l’asesinatu de Carlos inxeriase nel marcu d’una concentración organizada de la ultradrecha española. La mesma ultradrecha a la que cualalquier usuariu d’internet pué siguir los sos pasos: los sos actos, los sos conciertos, les sos conseñes y amenaces.

La mesma ultradrecha que, organizada, el 10 de setiembre de 2005 fió a sos deleres equí n’Asturies, en Cangues d’Onís, y tamién como hai dos meses en Madrí, col preste de la Delegación del Gobiernu, el señor Trevín; cola cuidanza de les fuercies de seguranza del estau, naquel casu, de la Guardia Civil y del aparatu xudicial. Ésti, a peticións del actual gobiernu del PSOE y más de dos años depués de los fechos, caltién a 22 persones imputaes por amosar la so refuga a lo que, llanamente, yera un actu racista de Democracia Nacional que pretendía llexitimase alredor d’ún arcaicu y erráticu entender franquista de la Hestoria.

Dende la Coordinadora Antifacista d’Asturies, queremos, con esta xornada, caltener vivu l’alcordanza de Carlos. D’ehí l’actu d’hai unes hores, el de recuperar el mural na so memoria, fecho’l 17-P y que los servicios municipales de llimpieza esborriaron a los seyes díes, anque nun amuesen les mesmes prieses por llimpiar les esvástiques y llemes facistes qu’adornen les paredes de les nueses ciudaes.

Tamién queremos solidarizanos, al travies la demanda d’unos fechos silenciaos, y mediante el sofitu llegal y económicu, coles persones imputaes en Cangues d’Onís, cuyu únicu delitu fue oponese cola so presencia’l actu de Democracia Nacional; en definitiva, oponese al racismu y al fascismu.

Si se pué, si se ha falar de víctimes en Cangues d’Onís, elles son los 22 imputaos y imputaes, víctimes nun sólo de la ultradrecha qu’asesinó a Carlos, sinon tamién de les conductes facistes que calistren la práutica xudicial, el marcu políticu y les fuercies de seguranza/represión del Estau Español.

La Coordinadora antifacista d’Asturies quier facer un llamau a toes les instituciones, coleutivos, ciudadanes y ciudadanos, cola fin d’afogar, aislar social, económica y políticamente a la ultradrecha: a les sos sigles, a les sos miembros y a toos aquellos y aquelles que sofiten coles sos conductes les idees racistes, xenófobes y facistes, que DN y otros partidos defenden y propugnen.

¡¡¡¡EL MEYOR HOMENAXE, SIGUIR LA LLUCHA!!!!