COMUNICÁU DE LA CIGUA

Dende la peña uviéista La Cigua, queremos amosar públicamente’l nuesu sofitu al comunicáu de la Peña Oviedin.com, asoleyando asina’l nuesu esmolecimientu pola situación actual del club. A xuiciu de nueso, ye pernecesariu que se produzan cambios en toles estayes del club, apostando d’una vegada pola cordura, qu’hasta agora nun se vio per dengún llau. Nun pue ser qu’una presona que sofita públicamente a los ultres del equipu rival, o que de cualesquier otra forma ataca al nuesu club, seya públicamente o non, tenga denguna responsabilidá de direición dientro del mesmu en denguna estaya, deportiva o económica. Polo tantu, paeznos imprescindible qu'esta situación nun vuelva repetise de nenguna de les maneres.
La Cigua quier tamién dexar constancia de les sos dubies, comparties con bona parte de l’afición carbayona, sobre la capacidá de xestión de los integrantes d’esti conseyu d’alministración, tantu p’acertar coles sos actuaciones nel tarrén puramente direutivu como na xera d’ilusionar y renganchar a la afición azul.
Por últimu, ta perdemostráu que solu los/es uvieístes seremos quien a dirixir el nuesu club como esta institución merez, polo qu'apostamos pola xunión de tola afición carbayona na llucha por recuperar el club.