COMUNICÁU DE LA CIGUA

La Cigua Hinches Uviéu desixe a la direutiva del R. Uviéu un tratu de respetu y decencia énte los socios/es y aficionaos/es azules. Refugamos dafechu’l comunicáu llamentable asoleyáu pol clú, faciendo por manipular y degradar a una afición que ta a la escontra de ser atracada pa salvar la pésima xestión de los altos mandos del Conseyu d’alministración

Llegaos a esti puntu, reclamamos unos precios razonables pa que los /es uvieístes podamos marcar el primer gol na eliminatoria que, a nadie se-y escaeza, VAMOS PERDIENDO.

Tamién pidimos la INMINENTE dimisión d’Alberto González y Evilasio Sánchez “Vili” por degradar la imaxe del uvieísmu y por caltener una postura a la escontra de los intereses del clú en ca decisión que tomen.

Como manera de protesta, mañana convocamos a tol mundu a axuntase a la convocatoria de concentración énte les oficines del clú nel Carlos Tartiere o na tienda del centru comercial “Calatrava”.

Pel momentu, facemos un llamáu a l’afición a NUN MERCAR ENTRAES pal partíu hasta que nun s’igüe la situación. En casu de nun haber marcha atrás nesti tema, posiblemente taremos avocaos a nun entrar nel estadiu énte la indignidá que se ta cometiendo escontra l’equipu, l’afición y la ciudá.

Pa finar, queremos tresmitir a los nuesos xugadores y cuerpu téunicu tol ánimu posible pa la suañada remontada. Esto nun va con ellos y llamentamos nun poder tar agora mesmo preparando l’animación, anque nun sedrá por ganes. Desgraciadamente, la ineptitú del Conseyu, con Alberto González a la cabeza, entámala cada vegada más y más xenerando permunchos problemes al nuesu clú.

L’UVIEÍSMU NUN YE UN NEGOCIU: YE UN SENTIMIENTU

SOLUCIÓN O RAMPLA