Según recueyen dellos diarios mexicanos, los dos principales diarios deportivos de Madrid y otros nacionales, güei pudo producise la robla definitiva de la compra-venta del paquete aicionarial del club, pasando a manes del azteca Grupu Pegaso. Esti grupu a la vegada controla l'equipu de futbol Atlante que xuega na máxima categoría nel pais americanu y que tien dellos llogros dende que ta controláu por David García, quien paez ser el máximu responsable del cambiu aicionarial y quien paez ser que tien gran reputación pola so xestión nel club cancunense. Entá nun tan claros los cargos na direición que tendrán los diferentes nomes qu'apaecen na prensa. Podría ser que David García, descendientes d'asturianos en México, podría ser el presidente pola cercanía sentimental que manifiesta col club, aunque esti aspeutu nun ta claru y tamien querríen cuntar con xente d'Asturies pa completar el conseyu d'alministración.Lo que si paez tar más perfiláu ye l'apartáu deportivu, onde por suerte, too paez indicar que'l d'esti domingu va ser el caberu partíu de Jose Manuel como entrenador y direutor deportivu carbayón, ya que'l nome de Richard Rodriguez paez ser el definitivu pa sentase nel bancu y ye que vien siguiendo al equipu nos caberos partíos, amás d'asistir a otros partíos d'equipos rivales del equipu azul na categoría. Na direición deportiva, Antonio Castillo ye firme candidatu y asegúrase que ya tien trabayao abondo pa reforzar l'equipu nesti mercáu d'iviernu, dando la baxa a dellos xugaores actuales del club que nun interesa la so continuidá.
Esperemos que too esto tenga final feliz y se produza'l deseyáu cambiu nel timón del club. Daos los precedentes, los mexicanos tendranlo prácticamente imposible pa facelo peor que quienes ocupaben el puestu hasta agora, asin qu'esperemos que'l cambiu de ciclu entame aina y podamos asistir a la torna del equipu onde merez, con unos dirixentes dilixentes.
¡PUXA UVIÉU!
0 comentarios:
Publicar un comentario